Господи Боже наш, преблагий человеколюбче, едине благий и кроткий, едине щедрый и милостивый Боже наш, и Отче Господа нашего Исуса Христа, при Понтийстем Пилате распятаго, и в третий день восставшаго, и вшедша в славу Свою, да приидет благодать Твоя на ны рабы Твоя. И даждь нам Господи Евангельския учения. Отче милосердый просвети наша сердца, и вся уды Твоим хотением. Очисти нас от всех злоб и греха. Соблюди же ны безскверны и непорочны, от всякаго действа належащаго, и даруй нам от Твоей благодати, Твоя разумевати, и от Твоих мудрствовати, и в Твоих заповедех ходити. И Твоего страха боятися, и творити угодная Тебе до последняго дне и часа нашего издыхания, призываем Тя Владыко истиннаго Бога нашего мы грешнии, да не изглаголанную Твоею милостию печатаешь живот наш, и тело и дух соблюдаеши от всякаго демона, от всякаго ползящаго належания, и от всякаго зверя земнаго, и от всякаго беззакония, и от всякаго потвора, и от всякия льсти пустошныя, и от всякаго блужения, и лихоимания, от всякия лжи, от всякаго не удобнаго действа, и от всякия сети належащия на нас. Отче нетления покрый нас Своя рабы милосердием, и благослови храм (дом) сей, и сотвори его чист. Не остави нас, ниже сотвори в радость врагом, и уничижение людем, в попрание демоном. Но да будет Твоя благодать и милость присно с нами, во вся дни живота нашего.
Яко Твоя держава и Твое есть Царство, и сила и слава во веки, аминь
Господи Боже наш, иже от персти создавый человека и от него создав жену, и равночестием почет ея, преступльшим же Твою заповедь, изгнав Израиля во многотрудное се житие: и рек мужеви поте лица своего снести хлеб: жене в печалях родити чада: изволивый Сам от жены родитися безгрешне, милостив буди Владыко грехом нашим, и освяти рабу Свою, (имярек), и очисти ея скверну телесную, и страсть душевную, и сподоби ю устрояти дому своего непорочне, .и очисти всяко сомнение от души ея, яко Ты еси благословляя, и освящая всяческая Христе Боже наш. И Тебе славу возсылаем, со безначалием Ти Отцем, и с Пресвятым и Благим, и Животворящим Ти Духом, ныне и присно и во веки веком, аминь.
Владыко Господи исусе Христе Слово Божие и Отчее, Сыне Единородный, иже нашего ради спасения, благоволением Безначального ти Отца, и со действом Единосущнаго и присносущнаго и Животворящаго Ти духа, сошед на конец летом во чрево Святыя Девицы, и воплощься и родився несказанно и неизреченно, яко же веси Сам един. Человек быв совершен, да нас избавиши и вражия мучительства. И первую клятву потребив, нас возрадованием Божества на небеса возвысиши, и на Отчем посадиши Престоле. Якоже присно деву Твою Матерь, и прежде Рождества и по Рождестве пребывшу неболезнену соблюл еси: тако благоволи Многомилостиве Владыко Преблагий Господи Исусе Христе и ныне рождьшую рабу твою (имярек) избави Ти всякаго навета вражия. И твоею благодатию и освящением, очисти и освяти даром и пришествием Святаго Ти Духа. Яко да и той послужившыя жены всегда раждати, вкупе же и прилучившиися вси в дому сем (имярек) приходящее без сомнения, Твоего освящения восприимут. Благоволи же и рождьшемуся (имярек) соблюдену бытии вышьши навета вражия, и сподобитися бани паки бытейстей, и честному сосуду бытии Твоея благодати, и причастием Пречистых и Божественных Твоих Тайн. Да наследник будет и небеснаго Ти царствия, яко да и ради того прославляется Пресвятое Твое имя, со Отцем и с пресвятым духом, ныне и присно и во веки веком.
Слава Тебе Царю, Боже всего создания, любителю рода человеча, за многое твое человеколюбие нас деля Всемилостиве волею изволивый младенец бытии. И освятив нас пришествием Своим вся любящыя Тя. И прославивый Матерь Свою Святым рождеством Ти. И благословивый Соломию бабу Свою приимшую Тя во исходе Твоем. Яко же благословил еси бабы египетския, приемлющыя и соблюдающыя младенцы Израилевы Тебе ради, тако благослови и сию рабу Свою (имярек) премшую младенца сего во имя Твое. И очисти от всякия скверны, плотския и душевныя и сподоби ю причащения Святых Твоих Тайн, да улучит часть Царствия Твоего, со всеми святыми угождьшими Ти от века. И тебе славу возсылаем, со безначальным Ти Отцем, и с Пресвятым и Благим, и Животворящим Ти Духом, ныне и присно и во веки веком, аминь.
Владыко Господи Боже наш, превечным Твоим и не изреченным смотрением, изволивый родитися в вертепе, от Пречистыя безмужныя Матере, и в яслех полежав, и благословив пришедшую на уверение Честнаго девства Соломию бабу, Ты и ныне благослови и рабу Твою сию бабу, (имярек), благословением Твоим. Яко Тебе подобает всякая слава, честь и поклонение, со Безначальным Ти Отцом, и с Пресвятым и Благим и Животворящим Духом, ныне и присно и во веки веком, аминь.
Господи Исусе Христе рождеися прежде век от Отца без матере, и в последняя лета послан быв без Отца родитися на земли, от браконеискусныя Матере: от волхвов дары приемыи, от пастырь славословие, от ангел пение, бабою повитый пеленами, и во яслех скотиях положеныи; просвещением Своим прииди, и благослови рабу сию, (имярек), приемшую младенца, и очисти ю к Церкви Святей Твоей пришедшую на очищение, Ты бо еси Бог наш, и Тебе славу возсылаем со безначальным Ти Отцем, и с Пресвятым и Благим и Животворящим Твоим Духом, ныне и присно и во веки веком, аминь.
И по амине знаменует отрочати чело, и уста, и перси.
Мир всем, главы ваша Господеви преклоните.
Господи Боже наш, един благ и человеколюбец, един свят и на святых почиваяй: иже верховному Твоему апостолу Петру, явльшимся ему видением, ничтоже скверна или нечиста мнети, о Тебе сотвореных, на пищу и в наслаждение человеком. И сосудом Твоим избранным апостолом Павлом, вся чиста чистым заповедав. Ты Сам Владыко пресвятым призыванием Страшнаго и Пречистаго Ти имене, и образом Честнаго и Животворящаго Креста, благослови и очисти раба Своего, (имярек), оскверньшагося от всякаго неприязненаго духа, и от всякаго мечтания и гада ядовитаго. От всякаго беззакония, от всякаго потвора. От всякия льсти, от всякия суеты, от всякаго недуга, от всякия язи. И от всякаго противнаго злодейства диязоля. И от вида сего сохрани Владыко раба Своего, от всякня злобы и греха соблюди нескверна и непорочна. И от всякия проказы противнаго, до последняго дне и часа и издыхания.
Ты бо еси благословя и святя всяческая Христе Боже наш и Тебе славу возсылаем со Безначальным Ти Отцем, и с Пресвятым и Благим и Животворящим Ти Духом, ныне и присно и во веки веком, аминь.
Вседержителю Слово Отчее, Сам совершен сый Исусе Христе, многаго ради Твоего милосердия николиже отлучаяся Своих овец, но присно в них пребывая, Исусе, добрый пастуше Своих словесных овец, не предаждь раба Своего, (имярек), крамоле змиине, ни желанию сатанину остави его, яко семя тли в нем есть. Ты убо Сам Господи Боже покланяемый Царю Пресвятый Исусе Христе, спяща его сохрани немерцающим светом, и осени его Духом Твоим Святым, им же освяти Своя ученики, избавляя его от сети вражия. Даждь сему рабу Твоему, (имярек), спасения Твоего на ложи его, просвяти его светом разумным Евангелиа Твоего в носиле сем, душу его любовию Креста Твоего, сердце его чистотою словесе Твоего, тело его освяти Твоею страстию безстрастною, и смысл его миром Твоим сохрани. И возрасти его во благоверии к Твоему славословию, и да будет причастник Пречистому Телу и Крови Твоей.
Яко свят еси и препрославлен Христе Боже наш, со Отцем и с Пресвятым и Благим, и Животворящим Духом, ныне и присно и во веки веком, аминь.
