возрождение традиций повивального дела 
Святое семейство
 
Ода родам  
   
Главная
Новости
Повивальное искусство
История водных родов
Наши единомышленники
Автор сайта
 
 
 
   

Молитвы


Молитвы по рождении младенца


Молитва жене по рождении младенца

Молитва 1

Владыко Господи Вседержителю, исцеляй всякий недуг и всякую язю. Сам и сию днесь родившую рабу Твою (имя) исцели и возстави ее от одра, на немже лежит, зане, по Пророка Давида словеси, в беззакониих зачахомся, и сквернави вси есмы пред Тобою. Сохрани сию ищего младенца, егоже роди, покрый ею под кровом крилу Твоею, от днешняго дне даже до последняго ея скончания, молитвами Пречистыя Богородицы и всех святых, яко благословен еси во веки веков. Аминь.

Молитва 2

Владыко Господи Боже наш, родивыйся от Пречистыя Владычицы нашея Богородицы и Приснодевы Марии, и яко Младенец во яслех возлегий, и яко детищ восприемлем бывый, Сам и сию рабу Твою, днесь родившую сие отроча, помилуй и прости вольныя и невольные ее прегрешения, и сохрани ю от всякаго диавольскаго мучительства, и из нея рожденнаго младенца соблюди от всякаго яда, от всякия лютости, от всякия бури сопротивнаго, от духов лукавых, дневных же и нощных. Сию же соблюди под державною рукою Твоею, и даждь ей скорое востание, и от скверны очисти, и болезни исцели, и здравие и благомощие души же и телу даруй, и ангелы светлыми, и сияющими сию огради, и соблюди от всякаго наития невидимых духов, ей Господи, от недуга и слабости, от ревности и зависти, и от очес призора, и помилуй ее и младенца, по велицей милости Твоей, и очисти ю от телесныя скверны, и различных ей находящих утробных стужений, и изведи ю скорою милостию Твоей во смиренном ея теле во исправление, и из нея рожденнаго младенца сподоби поклонитися земному храму, его же уготовал еси славословитися Имени Твоему Святому. яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков. Аминь.

Молитва 3

Господи Боже наш, благоволивыи снити с небес и родитися от Святыя Богородицы и Приснодевы Марии, спасения ради нас грешных, ведый немощное человеческаго естества, прости рабе Твоей (имя), днесь родившей, по множеству щедрот Твоих. Ты бо рекл еси. Господи: раститеся и умножитеся, и исполните землю, и обладайте ею. Сего ради и мы, раби Твои, молимся, и дерзающе незлобивым Твоим человеколюбием, со страхом вопием к Царствия Твоего Святому Имени: призри с небеси и виждь немощь нас осужденных, и прости рабе Твоей сей (цмя), и всему дому, в немже родися отроча, и прикоснувшимся ей, и зде обретающимся всем, яко Благ и Человеколюбец Бог, прости, яко Един имаши власть оставляти грехи, молитвами Пресвятая Богородицы и всех святых Твоих. Аминь.

Божией Матери в честь Ея иконы «Млекопитательница»

Тропарь, гл. 3

Без семене от Божественнаго Духа, волею же Отчею зачала еси Сына Божия, от Отца без матере прежде век суща, нас же ради из Тебе без Отца бывша, плотию родила еси и Младенца млеком питала еси, тем же не престай молити избавитися от бед душам нашим.

Кондак, гл. 5

Душ наших чувствия очистиши, узрим на иконе таинство преславное, Творца вселенныя и Господа вышних сил, во объятиях держима и от сосцу Твоею яко Младенца питаема, и со страхом и радостию покланяющеся Тебе, Спасу нашему, воззовем: Радуйся, Владычице, жизни нашея питательница.

Приими, Госпоже Богородительнице, слезная моления рабов Твоих, к Тебе притекающих, на руках носившую и млеком питавшую Сына Твоего и Бога нашего, Господа Иисуса Христа. Аще и безболезненно родила еси Его, а паче матерния скорби веси и немощи сынов м дщерей человеческих зриши. Темже тепле припадающе к Тебе молим Тя, всемилостивая Владычице: нас грешных, осужденных в болезнех родити и в печалех питати чада наша, милостивно пощади и состадательно заступи, младенцы же нашя, такожде и родившыя их, от тяжкаго недуга и горькия скорби избави. Даруй им здравие и благомощие, да и питаемии от силы в силу возрастати будут, и питающыя их исполнятся радостию и утешением, яко да и ныне предстательством Твоим из уст младенец и ссущих Господь совершит хвалу Свою. О, Мати Сына Божия! умилосердися на матери сынов человеческих и на немощныя люди Твоя: постигающыя нас болезни скоро исцели, належащыя на нас скорби и печали утоли, и не презри слез и воздыханий рабов Твоих, услыши нас в день скорби и в день радости избавления приими благодарная хваления сердец наших. Вознеси мольбы нашя ко престолу Сына Твоего и Бога нашего, да милостив будет ко грехом и немощем нашым и пробавит милость Свою ведущым имя Его, яко да и мы, и чада наша, прославим Тя, милосердую Заступницу и верную надежду рода нашего, во веки веков. Аминь.

Молитва от разных детских болезней

Святителю Иулиану Кеноманийскому

Святителю отче Иулиане, нетлением честных мощей твоих и многими благодеяниями, чудесно содеянными и содеваемыми тобою с верою к тебе притекающим, уверившиеся, яко имаши велию благодать у Господа Бога нашего, всесмиренно приподаем вси и молимся тебе: Моли о нас Христа Бога нашего, да ниспослет всем, чтущим святую память твою и усердно к тебе прибегающим, богатыя милости Своя: да утвердит во святей Своей православной Церкви живый дух правыя веры и благочестия, дух ведения и любве, дух мира и радости о Духе Святе, да вси члены ея, чисты от мирских искушений и плотских похотей и злаго действия злых духов, духом и истиною поклоняются Ему и усердно пекутся о соблюдении заповедей Его ко спасению душ своих. Пастырем ея да даст святую ревность попечения о спасении людей, им вверенных, да неверующих просветят, неведущих наставят, сомневающихся вразумят и yдocтoвepят, отпадших от православныя Церкве обратят в святыя недра ея, верующих соблюдут в вере, грешных подвигнут к покаянию, кающихся утешат и укрепят в исправлении жизни, раскаивающихся и исправившихся утвердят в святости жизни: и тако всех ведут указанным от Него путем в уготованное вечное царство Его. Ей святителю Божий, да устроиши молитвами твоими вся благая душам и телесам нашим: да и мы прославим в душах и телесех наших Господа и Бога нашего, Иисуса Христа, Емуже со Отцем и Святым Духом слава и держава во веки веков. Аминь.



       
2006-2007, Повитуха.ру.
Использование материалов без разрешения авторов сайта запрещено.
Сайт разработан и поддерживается Abacus Ltd